పురుషోత్తముడు మూవీ రివ్యూ (తెలుగు సినిమా)

కాస్ట్ & క్రూ:
హీరో: రాజ్ తరుణ్
హీరోయిన్: హాసిని సుధీర్
సపోర్టింగ్ కాస్ట్: బ్రహ్మానందం, రమ్యకృష్ణ, ప్రకాష్ రాజ్, మురళీ శర్మ, విరాన్ ముత్తంశెట్టి
దర్శకుడు: రామ్ భీమా
నిర్మాతలు: ప్రకాష్ తేజావత్, రమేష్ తేజావత్
మ్యూజిక్ డైరెక్టర్: గోపీ సుందర్
సినిమాటోగ్రాఫర్: పి జి విందా

తెలుగు చిత్ర పరిశ్రమలో ప్రస్తుతం హాట్ టాపిక్ అయిన రాజ్ తరుణ్ తాజా చిత్రం ‘పురుషోత్తముడు’. టీజర్, ట్రైలర్ ప్రేక్షకుల్లో మంచి ఆసక్తిని రేకెత్తించాయి. ఈ చిత్రం ఈ శుక్ర‌వారం థియేటర్లోకి వ‌చ్చేసింది. ఈ సినిమా ఎలా ఉందో రివ్యూ రిపోర్టులో చూద్దాం.

కథ:
లండన్ నుండి వచ్చిన యువకుడు రచిత్ రామ్ (రాజ్ తరుణ్), తన తండ్రి కంపెనీ పరశురామయ్య ఎంటర్‌ప్రైజెస్ సీఈఓగా చేయ్యాల‌నుకుంటారు. కానీ కంపెనీ నియమాల ప్రకారం, భవిష్యత్ సీఈఓ 100 రోజుల పాటు ఎక్కడికైనా వెళ్లి, తమ కుటుంబ ప్రభావాన్ని వాడకుండా సాధారణ జీవితం గడపాలి. రచిత్ ఈ సవాల్‌ను స్వీకరించి సామాన్య జీవితంలో మునిగిపోతాడు. ఈ సమయంలో, అన్యాయానికి గురవుతున్న రైతులను ఆదుకోవడం, పూల తోటలు పెంచే అమ్ములు (హాసిని సుధీర్) తో ప్రేమ‌లో ప‌డ‌టం వంటి అనేక ట్విస్టుల‌కు లోన‌వుతాడు. చివరికి రచిత్ తన సీఈఓ క్వాలిఫికేషన్ సాధించాడా లేదా అనేది తెలుసుకోవాలంటే సినిమా చూడాల్సిందే.

నటీనటుల ప్ర‌తిభ‌:
రాజ్ తరుణ్ తన మునుపటి పాత్రల కంటే ఈ సినిమాలో గ్లామర్‌గా కనిపిస్తాడు. ‘శ్రీమంతుడు’లో మహేష్ బాబు చేసినట్లుగా ఈ పాత్రను చేశాడు. తన నటనతో తన పాత్రకు న్యాయం చేశాడు. హాసిని సుధీర్ అందంగా కనిపించింది, కానీ ఆమె నటన ఇంకాస్త మెరుగుపర్చుకోవాలి. రమ్యకృష్ణ తన పాత్రలో హుందాగా నటించి సత్తా చూపింది. విరాన్ ముత్తంశెట్టి నటన పర్వాలేదనిపించింది. మురళీ శర్మ తన సెటిల్డ్ పెర్ఫార్మెన్స్ చూపించాడు. ప్రవీణ్ కామెడీ మాస్ ఆడియన్స్‌కి నచ్చే విధంగా ఉంది. ప్రకాష్ రాజ్ అతిథి పాత్రలో ఉన్నప్పటికీ, అతని డైలాగులు బాగా పేలాయి. మిగిలిన నటీనటులు కూడా బాగా నటించారు.

సాంకేతిక ప్రతిభ:
ఈ సినిమాకు సాంకేతికంగా మంచి క్వాలిటీ ఉంది. సినిమాటోగ్రఫీ అద్భుతంగా ఉంది, గోపీ సుందర్ సంగీతం సినిమా స్థాయిని పెంచింది. పాటలు వినసొంపుగా ఉన్నాయి, మాటలు బాగా రాసారు. నిర్మాతలు ఎక్కడా కాంప్రమైజ్ కాకుండా సినిమాకు మంచి బడ్జెట్ పెట్టారు. ప్రతి ఫ్రేమ్ పెద్ద హీరో సినిమాల్లో చూసినట్లు రిచ్ గా ఉంది. 2 గంటల రన్ టైం మరొక ప్లస్ పాయింట్.

విశ్లేషణ:
‘పురుషోత్తముడు’ సామాజిక బాధ్యత, వ్యక్తిగత సాంప్రదాయం విషయాలను గుర్తు చేస్తుంది. రచిత్ రామ్ పాత్ర సమాజ సమస్యలను, ముఖ్యంగా రైతుల సమస్యలను ఎత్తిచూపిస్తుంది. డైరెక్టర్ రామ్ భీమా కమర్షియల్ ఎలిమెంట్స్ తో పాటు, మంచి సామాజిక సందేశాన్ని కలిపి, అద్భుతమైన సినిమా అనుభవాన్ని అందించాడు. వినోదం మరియు ఆలోచనాత్మక కంటెంట్ కలిపిన ఈ సినిమా ఆసక్తికరంగా ఉంది.

ముగింపు:
‘పురుషోత్తముడు’ ఒక ఆకట్టుకునే సినిమా, ఇది వినోదం, సామాజిక వ్యాఖ్యానం రెండింటినీ అందిస్తుంది. కథా విషయంలో కొత్తదనం లేకపోయినా, సినిమా యొక్క బలమైన నటన, సాంకేతిక ప్రతిభ, సమకాలీన సందేశం ఈ సినిమాను హిట్టు సినిమాగా నిల‌బెడుతుంది.

రేటింగ్: 3.25 / 5